پێناسەی نەخۆشی:
خودای گەورە پێگەی چاوەکانی لە دەموچاوی مرۆڤدا بە شێوەیەک داناوە کە لە کاتێکدا جوانییەکی سەرسوڕهێنەر دروست دەکات، گەورەترین ئەگەری بەکارهێنانی هێزی بینین هەیە. جوڵەی هەر چاوێک لە لایەن ٦ ماسولکەوە دابین دەکرێت کە دەتوانن چاو بە هەموو ئاراستەکاندا بجوڵێنن. لە کەسانی تەندروستدا جوڵەی هەردوو چاو بە ئاراستەی جیاوازدا ڕێکوپێکی و هەماهەنگییەکی دیاریکراوی هەیە. چالاکی هەموو ماسولکەکانی هەردوو چاو لە لایەن مێشکەوە ڕێکدەخرێت بەجۆرێک هەمیشە وێنەیەک لە یەک تەن لەسەر پەڵەی زەرد (ماکولا)ی هەردوو چاو دروست دەبێت، هەروەها دەماری بینایی هەر چاوێک دەتوانێت ئەم وێنەیە بە جیا بنێرێت بۆ مێشک، هەروەها مێشک وێنەکانی هەردوو چاوەکە کۆدەکاتەوە بۆ ئەوەی کەسەکە بتوانێت وێنەی هەردوو چاوی لە یەک کاتدا هەست پێبکات و وەک یەک شت بیبینێت و بینینی سێ ڕەهەندی هەبێت. ئەم حاڵەتەی دوو چاوەکە پێی دەوترێت “ڕێکخستن”. هەرکاتێک ئەم ڕیزبەندییە بەهەر هۆکارێک تێکچوو، لادان لە چاوەکان ڕوودەدات، لەو حاڵەتەدا میحوەری بینینی چاوێک کە بارودۆخی بینینی باشتری هەیە و لەلایەن مێشکەوە وەک چاوی سەرووتر هەڵدەبژێردرێت، تەرکیز لەسەر شتە خوازراوەکە دەبێت و هەموو لادانێک دەگوازرێتەوە بۆ چاوەکەی تر.
